Hüseyn əzadarı

Muhərrəmdə əza tutmaq ibadətdir əzadarə,
Həqiqət carçısı şaha itaətdir əzadarə.

Səni Zəhra sevib, canı bilib peyğəmbəri-xatəm,
Əli övladının zikri səadətdir əzadarə.

Bəşər üstün yaranmışdır, fəqət bundan da üstün var
Vəsiləndən vücud tapmaq şərafətdir əzadarə.

Olan müşkül, çətinliklər tapar həllin, olar asan
Bütün müşküllərin həlli inayətdir əzadarə.

«Hüseynim can!» deyən anda gözündən yaş süzülməzsə,
Dözülməz dərdə düşməzsə, xəcalətdir əzadarə.

Əgər qəlbində var eşqin, çəkər aləmlərin dərdin
Həmin günki döyüş hər cür dəyanətdir əzadarə.

İmamın ali-amalı həyat verməkdi İslamə
Bir an çıxsa əgər yaddan qəbahətdir əzadarə.

Hüseynin qanlı köynəkdə düşünsə şiə qan ağlar,
Gözündən hər düşən damla şəfaətdir əzadarə.

Hüseynin Kərbəlasıyla nicat tapmışsa yadlar da
Yaşatmaq Kərbəla şövqün əmanətdir əzadarə.

Həyatında «Hüseynim can» deməkdən başqa söz yoxdur
Dili lal olsa məhşərdə kifayətdir əzadarə.

Məni şah etmə Allahım, nökər et, şahların şahı
Hüseyn eşqində qərq olmaq nəhayətdir əzadarə.

Şahin Qurbanov,
İmam Sadiq (ə) adına İslam Maarifi Akademiyası
«Dəyərlər» Dini Jurnalistika Məktəbinin dinləyicisi