Azercell məscidlərdə antenna quraşdırır?

Bu yaxınlarda xəbər gəldi ki, Azercell şirkəti özünün yeni ötürücülərini quraşdırmaq üçün məscidlərə üz tutub. Məscidlərin bəziləri onlara yox cavab versə də, onlara müsbət cavab verənlər də tapılıb.
Belə ki, əldə etdiyimiz son məlumata görə, Azercell şirkəti Bakıxanov qəsəbəsində özünün ötürücüsünü quraşdırmaq üçün qəsəbənin mərkəzi məscidi olan “İmam Rza” məscidinə müraciət etmiş və məscidin rəhbərliyi tərəfindən müsbət cavab almışlar.
Məlumatı dəqiqləşdirmək üçün məscidə getmiş və məscidin rəhbərliyindən məsələ ilə bağlı fikirləri öyrənilmişdir. Onlar bu məsələni adi hal kimi qeyd etmiş və bildirmişlər: “Azercell şirkəti məscidin həyətində öz ötürücüsünü quraşdırmaq niyyətini bizə çatdırmışdır. Bunun əvəzində məscidin elektrik enerjisi və qaz pulunu ödəyəcəklərini, həmçinin hər il məscidin hesabına 1500 manat pul yatıracaqlarını bildirmişlər”
Qeyd edək ki, quraşdırılması nəzərdə tutulan bu ötürücü hündürlüyü 18 metr olan palma şəklində olacaq ki, bu da əhalinin və məscidə ibadətə gələnlərin diqqətini bir o qədər də cəlb etməyəcək.
Hal-hazırda ötürücünün quraşdırılması üçün işlərə başlanılmış və qısa vaxt ərzində işlərin tamamlanacağı bildirilir. Məsciddə ibadə gələnlər və ətraf ərazidə yaşayan əhali isə məsələdən narahat olduqlarını bildirmişlər.
Nəzərinizə çatdıraq ki, adı çəkilən məsciddə 1992-ci ildən indiyə qədər tikinti işləri aparılır. Maraqlısı da ondadır ki, bu hadisə məscidin tikintisinin başa çatmaq üzrə olduğu bir dövrə təsadüf edir.

Aqşin Əsgərov
İmam Sadiq (ə) adına İslam Maarifi Akademiyası
«Dəyərlər» Dini Jurnalistika Məktəbinin dinləyicisi